Настя ИВАНОВА, Марий кугыжаныш университетын студентше, 2020 ийын юнкоржо:
– 4-ше классыште тунеммем годым «Пионерская правда» газетын 90 ияш лӱмгечыжлан пӧлеклалтше викториныште сеҥышыш лектынам. Мемнам, сеҥыше-влакым, Марий Тиште кечын пайремыш ӱжыныт. Тунам икымше гана «Ямде лий» газетын тӱҥ редакторжо Лидия Васильевна Семёнова дене палыме лийынам. Поро шинчаончалтышан, ласкан кутырышо вуйлатыше йочан кумылжым иканаште савырен. Заметкылам, почеламут-шамычым чӱчкыдынрак колташ тӱҥалынам. Тыршымем арам лийын огыл: 2020 ийыште «Рвезе йӱк» конкурсышто Зинаида Емельяновна Яковлева лӱмеш премий дене палемдалтынам. Сеҥымашке шумашке марий йылмым туныктышо Вячеслав Емельянович Смирновын надырже кугу. Уста туныктышемлан кугу таум ойлем. Кызытатат «Ямде лий» – ик эн йӧратыме газетем. Шольым дене пырля кажне арнян шергалына. Тудымат возаш кумылаҥдем. Йӧратыме газетем, шочмо кечет дене! Кужу ӱмыран лий!
