Тиде семӱзгар тачысе кечынат кӱлешлыкшым йомдарен огыл. 2019 ий гыч кӱсле Марий Эл Республикын национальный брендшылан шотлалтеш.
Теве Звенигово район Кужмара йоча сымыктыш школышто «Йоҥгалтыш» кӱслезе ансамбль 1986 ий гыч пашам ышта. Тудым В.В.Костерова вуйлата.
– И.С.Палантай лӱмеш музыкальный училищым тунем пытарымеке, Куж-мара селашке колтеныт. Совхоз вуйлатыше, кӱсле дене шоктен моштымем нерген пален налмекыже, Моско гыч вич у кӱслем налын конден да музыкальный школлан пӧлеклен. Тиде семӱзгар дене шокташ кумылан-влак лектыныт. Тыге ансамбль шочын, – ойла Валентина Витальевна.
Ансамбль ий гыч ийыш вияҥын, кушкын, тӱрлӧ конкурсышто мастарлыкшым ончыктен. Икмыняр жап гыч тудлан «Йоҥгалтыш» лӱ-мым пуэныт.
– «Йоҥгалтыш» рушлаже «звенящий» манын кусаралтеш. Звенигово дене иксемынрак шокта. «Йоҥ» манмыже кӱсле кылын йоҥгалтмыжым ушештара, – ойла В.В.Костерова.
Кызыт ансамбльышке лу-латкум ияш латкок ӱдыр коштеш. Кажныжын кӱслеже уло. Йоча-влак эн ончыч семӱзгарын эртыме корныжо дене палыме лийыт, вара гына шокташ тунемыт. Могай гына семым огыт лук: кумдан палыме йоча муро, куштымо сем гыч тӱҥалын марий кӱсле дене шокташ лӱмын возымо муро марте. Шымлыме пашамат возат. Мутлан, Ульяна Степанова «Эти удивительные гусли» пашажым Чакмарий школышто эртаралтше ик мероприятийыште арален.
«Йоҥгалтыш» ансамбль эн кугу сеҥымашыжлан 2017 ийыште «Хранители наследия» тӱнямбал конкурсышто Гран-прим налмыжым шотла. ™дыр-влак тушто Звенигово вел куштымо семым шоктеныт. Эн шергыже – республикысе йоча сымыктыш школласе оркестр ден ансамбльла коклаште эртаралтше конкурс. ™маште тушто кумшо верыш лектыныт. Ӱдыр-влак «Звените, гусли, над Кокшагой» тӱнямбал, «Струны гуслей соединяют столетия» регионысо конкурслаште кажне гана мастарлыкыштым ончыктат.
Ончыкыжым усталыкыштым вияҥдаш, кугурак конкурслаште марий кӱсле да сем дене палдараш шонат. Самырык тукым тиде семӱзгар дене шокта гын, марий кӱслен ӱмыржӧ кужу лиеш.
