«Йоча – эн кугу поянлык. Тудо илышым сӧрастара, пашам ышташ кумылым луктеш, ончыко пеҥгыдын да ӱшанлын ошкылаш вийым ешара», – ойлат шуко шочшан ава-ача Татьяна Вячеславовна ден Андрей Николаевич.
Николаевмыт латик ий икте-весым йӧратен, пагален, пырля лийме кажне татым аклен илат. Нуно Йошкар-Ола гыч Медведево районысо Руэм посёлкыш вич ий ончыч илаш кусненыт.
Еш оза Андрей Николаевич Йошкар-Олаште шочын-кушкын. 2002 ий гыч «Марий Эл» кугыжаныш ансамбльын участникше. Ятыр номерыште соло партийым кушта. Шке пашажым йӧрата да коллективше дене моткоч кугешна. Татьяна Вячеславовна – Кужэҥер район Йывансолан шочшыжо. Университетым тунем пытарымек, шым ий аналитиклан пашам ыштен. Илен-толын, паша верым алмаштен. Кызыт салонышто парикмахерлан тырша. «Вес еҥым моторым ышташ йӧратем. Мыланем эн кугу пашадар – тиде айдемын шыргыжалмыже да шуктымо сомылем аклен моштымыжо», – ойла тудо.
Кугешнымаш
Кок йӧратыше шӱмын саскашт – кажне кечын куан кумылым пӧлеклыше кум икшывышт. Эн кугу ӱдырышт – Анюта. Тудо изиж годсек пӱсӧ уш-акылан улмыж дене ойыртемалтеш. Кок ияшак лудаш тунемын, мастарлыкше дене ача-аважым ӧрыктарен. Тунамак ятыр почеламутым пален. Йочасадыш коштмыж годым марий почеламутлам лудмо конкурслашке чӱчкыдын ушнен, призовой верлашкат лектын. Анюта чыла «визытанлан» гына тунемеш. Тений кумшо классым тунем пытарен. Эше ӱдыр сӱретлаш мастар. Руэм посёлкысо музыкальный школ пеленысе художественный студийыш коштеш, профессионал сӱретче лияш ямдылалтеш. Усталык шӱлышан ӱдыр музык деке шӱман. Гитар дене шокташ тунемаш кумылжо идалык ончыч лектын. Тунам Анютан ача-аваже мастарлыкшылан ӱшанен да тидлан тӱткышымат ойырен огытыл. Идалык жапыште ӱдыр оксам шке поген да йӧратыме семӱзгаржым налын. Гитарлан «Бременские музыканты» фильмым ончымекыже шӱмаҥын. «Алло, мы ищем таланты» школысо конкурсышто гитарым шоктен, ты фильм гыч мурым мураш шона.
Кокымшо ӱдырышт – Ксюша. Руэмысе «Лесная сказка» йочасадыш коштеш. Йочасадыште эртаралтше пайремлаште мурылам йоҥгалтара. Флейте дене шокташ тунемын, но школлан ямдылалтме пагытлан кӧра ты семӱзгарым кызытеш ӧрдыжеш кодаш логалын. Курчак-влакым пога. Бисер дене сӱретым шерла. Поро чонан ӱдыр кеч-кӧнат кумылжым налын мошта.
Кум ияш изи Роман – чот вучымо икшыве. «Кумшо гана ава лийме йӧршеш ойыртемалтше кумылым луктын. Кок ӱдыр шочмеке, Юмо эргым пӧлеклыже манме ӱшан дене иленна», – куанже дене пайлалте пиалан ава. Рома ачаже семынак кушташ кумылан. Муро йӱкым колешат, лӱдде, вожылде, вигак тавалтен колта.
Келшен илат
Татьяна Вячеславовна ден Андрей Николаевич кажне икшывын ойыртемжым, мастарлыкшым ужын моштат. Изинек келшен, ваш полшен илаш, родо-шамыч дене кылым кучаш, унала кошташ да тукым нерген пален налаш туныктат. Йоча пагыт веселан да порын шарналт кодшо манын, эргышт ден ӱдырышт-шамычлан шуко жапым ойырат. Т.В.Николева нунын дене пырля тӱрлӧ кочкышым ямдыла, мелнам кӱэштеш. Аван тутлын кочкаш шолтымыжым, еш верч азапланымыжым йоча-влак изинек ужын кушкыт. Ачаштым гын поснак йӧратат. Андрей Николаевич кажне икшывыжым ӧндал-шупшал вашлиеш, тыгак малаш пышта.
Вӱд воктеке
Кеҥежым, 5-8 августышто, Николаевмыт вӱд воктеке канаш коштыт. Тиде ынде еш йӱлаш савырнен. Молан лач август тӱҥалтыш? Кудымшо числаште Татьяна Вячеславовна шочмо кечыжым палемда. Вес ийлан Рома кугурак лиешат, ешге теплоход дене кугу олалаш каяш шонат. Эше Николаевмыт тӱшкан оксам погат. Ты шийвундо дене кажне ийын канаш коштыт. Копилкым сурт оза шонен луктын да «На мечту» манын палемден.
«Ешыште яндар да волгыдо йӧратымаш озаланышаш. Лач ты шижмаш гоч умылымаш ден келшымаш шочыт. Икшыве-влак еш кокласе кылым эшеат пеҥгыдемдат. Тек кажне еҥ пиалан лиеш», – ешарышт Татьяна Вячеславовна ден Андрей Николаевич.
