Кеҥеж канышым чылан йӧратат. Оласе йочасадыш але школыш коштшо ӱдыр-рвезе-влак кокла гыч шукынжо ты пагытлан ялыш коча-ковашт деке вашкат. Яндар южышто модыт, пӱртӱсым эскерат, тыгодым пашалан тунемыт.
Теве Марий Турек район Кӱшыл Мосара ялыште илыше Димитрий Кибардин ден Даниил Филиппов шуко жапым пырля эртарат. Даниилын Эмма шӱжаржат модмашке ушна. Кеҥеж канышлан Ямал-Ненец автоном округ гыч ты ялыш коваж деке унала Артём Белкин толын. Чыланат пырля лияш тыршат. Велосипед дене кудалыштыт, йоча площадкылаште модыт, чӱчкыдын олыкышко вашкат. Ты вер, очыни, йоча-шамычын ик эн йӧратыме. Вет тушто кугу да пеҥгыде пушеҥгыште тарзанкым ыштеныт. Икшыве-влак, тусо кандырам кучен, лӱҥгалташ кумылан улыт. Ялысе паша дечат огыт лӱд: пареҥге пакчашке лектыт, лишыл еҥыштлан шудым ямдылаш полшат. Кеҥеж каникулым веселан да пайдалын эртарат.
Майя Филиппован фотожо.
