Тӱням шке моторлыкшо дене куандараш кеч-могай пеледышлан вияҥаш да пеҥгыдемаш кӱлеш. Йочаланат ты корным эртыман. Усталыкым тӱрлӧ конкурсышто тергымаш ончыкылык илышлан кугу шӱкалтышым ышта, пеледыш семынак тӱзланаш полша. Ты шонымашым илышыш шыҥдараш манын, Марий тӱвыра рӱдер «Пеледше тукым» республикысе йоча усталык конкурсым ий еда эртара.
3 апрельыште Курчак театрышке республикын 11 районысо ден округысо, Йошкар-Оласе йочасадлаш коштшо ӱдыр-рвезе влак погыненыт. Залыште йомак шӱлыш озаланен: икшыве-шамычлан весела кумылым Маша ден Маска пӧлекленыт.
Южо икшыве тӱрлӧ номинацийыште таҥасен. Теве Оршанке район Кугунур йочасадыш коштшо Арина Прозорова ден Вера Козлова «Изи мӱкш» ансамбль дене пырля куштеныт. Вара ӱдыр-влак «Йолташем ден коктын» мурым йоҥгалтареныт.
«Ме мураш моткоч йӧратена. Репетицийыш эре пырля коштына. Кугече пайремлан «Пасха красная» мурым ямдылена», – ойлат Арина ден Вера.
– Икшыве-влакым ме изинек мураш-кушташ туныктена, тӱрлӧ конкурсышто вийнам тергена. «Пеледше тукымлан» ямдылалташ шукын полшеныт: Елена Сергеевна Рыбакова мурым келыштарен, селасе тӱвыра пӧрт паша еҥ-шамыч куштымашым тӧрленыт. Чаманен каласыман, йоча-влак марла начарынрак мутланат, коклан веле марий шомакым колаш логалеш. Туге гынат шочмо марий йылмым эре ушештарена, – палдара Кугунур йочасадын воспитательже Светлана Борисовна Мочалова.
Кажне коллектив, кажне икшыве шке семынже уста да ойыртемалтше койышан лийын. Но конкурсышто эн виянже сеҥышыш лектеш. Жюрин иктешлымыж почеш, куштымаш номинацийыште икымше верым Советский посёлкысо 3-шо номеран йочасадысе «Изи шӱдыр» ансамбль налын. Эн виян мурызылан Шернур посёлкысо «Сказка» йочасадыш коштшо Анастасия Волкова шотлалтын. Эн тале дуэт семын Вера Козлова ден Арина Прозорова ойыртемалтыныт. Эн тале мурышо ансамбль семын Йошкар-Оласе 67-ше номеран йочасадысе «Колокольчик» ансамбль(снимкыште) палемдалтын.
Катя СЕРГЕЕВА.
Авторын фотожо.
