Марий Элыште йоча-влаклан келшыше сылнымутым возышо марий да руш серызе-влак шагал улыт. Йоча шинча дене ончышо, йоча йылме дене «кутырышо» писатель-влак кокла гыч иктыже – руш серызе Екатерина КЛЮЖЕВА.
– Екатерина Михайловна, писатель лияш мо таратен?
– Ты корныш йӧршын вучыдымын шогалынам. Тиде мыйын профессием дене нигузе кылдалтын огыл. Мый программист улам. Школышто литератур урокым йӧратенам, но жап эртымеке, тидын нерген монденам. Йошкар-Оласе Ширяйково микрорайон дене ошкылшемла, шинчамлан тошто пӧрт, кугу пушеҥге, пий-шамыч перненыт. Мӧҥгӧ пӧртылмекем, ужмем почеш эссем возенам. «Пуракаҥше» лаштыкемым икмыняр жап гыч луктынам да серымем келшен. Эссем мучашленам. Тыге ойлымаш шочын.
– Тендан музыда кӧ?
– Вич ияш эргым возаш кумылым луктеш. Ола урем дене ошкылшыжла мура. Шукерте огыл почеламутым возен. Мыят тудын дене пырля почеламут корнылам шочыктем.
– Персонажда-влак илыш гыч налме улыт?
– Уке. Южыжым, можыч, чын илыш гыч налынам. Произведенийласе образем-влак иктешлыше улыт: иктын койыш-шоктышыжо весе дене ушнен, кокымшын тӱсшӧ кумшо дене варналтын.
– «Ещё чашечку?» ойлымашын Наденька персо-нажше дене тендан мо икгай уло?
– Шонен лукташ, фантазироватлаш йӧратымына, очыни. Школышто тунемме годым класс вуйлатышына икана тыгай йодышым пуэн: «Те иктаж-могай шонымашым илышыш шыҥдарен кертыда ыле гын, мом ойыреда ыле?» «Тӱня кажне 10 минутышто вашталтше», – манын вашештенам. Южгунам йокрок лийын кая. Садлан мый фантазий тӱняшке «куснем». Наденька персонажем тыгаяк.
– Кажне йоча серызе лийын кертеш мо?
– Кажне йоча серызе лийын кертеш, очыни. Эн ондак шижмашым кӱчыкын возет. Мутлан, ала-молан чот куаненат але ала-кӧлан нелеш налынат. Вара молан куанымет але сырымет нерген шоналтет. Тиде мо дене мучашлалтмым иктешлымаште серет. Тыге ойлымаш-влак шочыт.
Авторын фотожо.
