Марий Турек район Сысоево школын тунемшыже Карина Тихонина шоҥгыеҥ, уста еҥ-влак дене вашлийын мутланаш йӧрата. Нунын шарнымашыштым, ушан ойыштым тетрадьыш возен, иквереш чумыра. Тыге тудын шымлыме пашаже-влак шочыт. Шукерте огыл возымо проектше уста тӱрлызӧ З.П.Михеева нерген лийын.
– Кугезе кована-влак вынерым куаш да тӱрым тӱрлаш моткоч мастар лийыныт. Кушан могай тӱрым вераҥдышашым раш паленыт. Марий тӱрым вынереш шотлен тӱрленыт. Тӱр осал вий да чер деч арален, могай кундем гыч улмым палдарен. Мемнан кундемыште ӱдырамаш тувырышто оҥеш тӱрлымӧ тӱр (чызорол) кум мучашан улмаш. Чыла тидым мый Зоя Поликарповна деч пален налынам, – ойла Карина.
Молгунам Карина шымлыме паша-влакым рушла возен гын, ты гана шочмо марий йылме дене серен. Тудым марий йылмым туныктышо Э.Л.Смоленцева кумылаҥден (снимкыште Карина дене пырля). Карина пырля тунемше йолташыже-влак деч марий вургем, тӱр, йӱла нерген мом палымыштым йодыштын. Тушеч рашемын: йоча-шамыч кызытсе уста тӱрлызӧ-влак нерген шагалрак колыныт. Тугеже Каринан шымлыме пашаже йоча-влаклан пайдале лийшаш. Тудо тӱҥалтыш класслаште тунемше-влак дене вашлиймашым эртараш, марий йӱла, кидмастар-шамыч нерген палдараш шона.
