Кумдан палыме руш серызе Аркадий Гайдарын «Тимур и его команда» повестьше кодшо курымышто элыштына тимуровец толкыным ылыжтен. Поро чонан да пашалан чулым ӱдыр-рвезе-влак пошкудыштлан кызытат полшат, шочмо кундемыштым тӱзатат. Марий Элым Вуйлатыше Юрий Зайцевын кӱштымыж почеш республикыште «Тимуровцы наших дней» акций эртаралтеш. Школлаште тунемше-влак ветеранлан, шоҥгыеҥлан, начар тазалыкан еҥлан да сарзыеҥ-шамычын ешыштлан полшат. Эртыше арняште теле пагыт тӱрлӧ койышыжым ончыктен. Игечын «пӧлекше» дене «кучедалмашке» тимуровец-влакат ушненыт. Медведево район Сенькан кыдалаш школышто тунемше-шамыч, у тунемме ий тӱҥалмекак, коча-кова-влаклан сурт кокласе сомылым ышташ полшат.
– Шыжым пакчаште тыршенна гын, кызыт лумым эрыктена. Акцийыш 5-8-ше класслаште шинчымашым погышо ӱдыр-рвезе-влак ушненыт. Мутлан, 6-шо класс Римма Алексеевна дек уналыкеш миен (снимкыште). Йоча-влакын поро пашашт шоҥгыеҥ-шамычын кумылыштым нӧлта да куаным пӧлекла, – ойла директорын воспитаний шотышто советникше Татьяна Эдуардовна Зырина.
Катя СЕРГЕЕВА.
Фото-влакым школ архив гыч налме.
