«Йӱштӧ Кугызан поездше» акций визымше ий эртаралтеш. Тений юзо коча да тудын поро йолташыже-влак кӱртньыгорнысо путешествийыштым 19 ноябрьыште Владивосток ола гыч тӱҥалыныт да 11 январьыште Великий Устюгышто мучашлат. Ты жапыште 70 олаште чарналтышым ыштат. Марий Элын рӱдолашкыже 23 декабрьыште толын шуыныт.
– Мыйын шочмо кундемышкем, Великий Устюгышко, кажне йоча миен ок керт. Садлан кӱртньыгорно пашаеҥ-влак деч полшаш йодынам. Нуно кажне уныкам дене вашлияш йӧным ыштеныт, кӱртньӧ имньым «кычкен», корныш тарватеныт. Теният уло Российым авалташ шонена. Изи да кугу олалаште вашлиймашым эртарена. Тыге Марий Эл Республикын рӱдолашкыжат толын шуынна.
У ий пайрем дене, йолташ-влак! Ваш йӧратен, пагален, чаманен илыза. Тек чоныштыда йӱлышӧ юзо шӱлыш нигунам огеш йӧрӧ, –Йошкар-Оласе кӱртньыгорно вокзалыште погынышо ача-ава, коча-кова, йоча-влакым Йӱштӧ Кугыза саламлыш да шкеж деке уналыкеш ӱжӧ.
Юзо поездын вагонжо-влак чынжымак йомакысе гай улыт. Иктыште пайремын тӱҥ геройжо-влак дене вашлийын мутланаш лийын, весыште икшыве-шамычым ятыр оҥай модыш вучен, вагон-рестораныште йӱдвел калык сийым тамлен ончаш темленыт. Воштончышан пӧлемыште йоча-влакым Лум королеве вашлийын.
Оля МАЙКОВА.
Снимкыште: Йӱштӧ Кугызан поездыштыже.
Ирина Желтован фотожо.
