«Чонлан лишыл, шочмо марий йылмем дене кугешнем», – манеш Советский район Кельмаксола школышто 11-ше классыште тунемше Карина Анисимова (снимкыште). Ӱдыр марий йылмым келгын шымла, правил-влакым тунемеш.
– Ешыште марла кутырена, садлан изинек шочмо йылмым пален, тудын кӱлешлыкшым шижын кушкам. Школыштат куанен тунемам. Марий йылме ден литературым туныктышо Ирина Валерьяновна Караваева тунемше-влакын чонышкышт йылме деке йӧратымаш тулым ылыжтен мошта. Садлан ятыр тунемшыже этнокультур предметла дене районысо да республикысе олимпиадылаште сай лектышым ончыкта. Мыят шке районыштем марий йылме дене олимпиадыште икымше верым налмемлан пеш йывыртенам ыле, – ойла ӱдыр.
Карина «Движение Первых» йоча толкынын эртарыме мероприятийыште чолгалыкым ончыкта. Кугыжаныш экзамен-влакым кучаш ямдылалташ тӱҥалын. Яра жапыште тортым кӱэшташ кумылан. Лудаш йӧрата.
– Марий серызе Шабдар Осыпын «Ӱдырамаш корно» романже шарнымашеш кодын. Произведений тунеммашын кӱлешлыкшым рашемда. Калыкын тӱвыра поянлыкшым арален кодаш ӱжеш, – ешарыш Карина Анисимова.
Шочмо йылмым аклыше, тудым шымлыше да икте-весе дене ӧрде, вожылде марла кутырышо ӱдыр-рвезе-влак калыкын ончыкылыкшо волгыдо лиеш манме ӱшаным шочыктат.
Оля МАЙКОВА.
Фотом еш архив гыч налме.
