Кажне еҥлан шочмо йылме эн шерге лийшаш. Йоча тудым пагалаш, моторлыкшым шижаш ешыште тунемеш гын, школыш кайымеке, келге шинчымашым налаш кумылаҥеш. Татарстан Республик Арск район Шорамучаш школышто марий йылмым да литературым туныктышо Олеся Игоревна Антипова шочмо йылмын ямжым кажне марий йоча деке намиен шукта.
– Шорамучаш школышто ныл ял гыч 52 йоча тунемеш. Нунын кокла гыч 17 икшыве – марий. Нуно марий йылмым тунемыт, молышт – татар йылмым, – ойла Олеся Игоревна. – Мый шкежат ты школым тунем пытаренам. Тунам марий йоча-влак «Б» классыште тунемынна, татар-шамыч «А» классыште. Марий-влак татар йылмым паленна. Татар-шамыч марла мутланен моштеныт. Кызыт сӱрет вашталтын, тунемше-влак икте-весышт дене лач рушла кутырат. Тидын шотышто ончыч телевизорым, телефоным, интернетым титаклыман. Кызыт умылем, йылмым аклымаш еш гыч тӱҥалеш.
Уста туныктышо шочмо йылмын ончыкылыкшо верч чон йӱлен тырша. Тӱрлӧ йӧным кучылтын, урокым эртара. Йоча-шамычлан модыш урок поснак келша. Тыгодым Олеся Игоревна уэмдыме марий модышым эртара. Модмо йӧре йӱла, пайрем нерген палдара. Тунемше-влак дене шымлыме пашам возат, конкурслаш ушнат. «Ямде лий» газет – тӱҥ полышкалышыже. Юнкор-шамычын возымыштым шергалыт, кроссвордлан, филвордлан вашмутым кычалыт. «Ямде лий» газетым ятыр тунемше налеш. Начарын илыше ешыште кушшо икмыняр икшывылан О.Антипова газетлан подпискым шке ыштен пуа.
– Йоча-влак марий йылмым тунемаш кумылан улыт. Шымлыме пашашт дене конкурслашке ушнат. 9-ше классым тунем пытарыше Эмиль Антипов Марий Эл Республик Морко район Унчо селаште эртаралтше «Ший талешке» шымлыме краеведений паша конференцийыште мастарлыкшым ончыктен. «Ший вӱд» («Ший шор») ансамбльыш коштшо ӱдыр-рвезе-влак дене тӱрлӧ фестивальыш ушнена, – ойла туныктышо.
О.И.Антипова «Ший вӱд» марий калык фольклор ансамбльым ятыр ий вуйлата. Тушко марий, татар икшыве-шамыч марла мураш, кушташ тунемаш коштыт. Уста туныктышо фольклор полшымо дене шочмо йылмым аклаш, йӱлам пагалаш, тӱрлӧ калык кокласе кылым пеҥгыдемдаш туныкта.
