«Пӱртӱс – тиде илыш. Тудын акшым нимо дене висаш да таҥастараш ок лий. Тугеже пӱртӱсым изинек аралышаш улына», – тыге ойла Волжск оласе 12-шо номеран школышто 9-ше классым тунем пытарыше Анастасия Данилова (снимкыште). Пӱртӱсым аклымыжлан, шымлымыжлан кӧра чолга ӱдыр «Орлёнок» всероссийский йоча рӱдерыште келге шинчымашым налын.
Настя Волжск оласе экологий рӱдерышке туныктышо М.В.Мичукован вуйлатыме «Животный мир» ушемышке кок ий наре коштеш.
– Пеленет уста тунытышо уло гын, кеч-могай кӱкшытышкӧ шуаш лиеш. Марина Валентиновна дене пырля ме экологийым шымлена. Мыла-нем хортобионт (шудышто илыше шукш-копшаҥге), мланде ӱмбалын кӱшыл лончыжо нерген уверым погаш оҥай. Шымлыме пашана дене тӱрлӧ вере ушненна. «Всерос-сийский атлас почвенных микроорганизмов» шымлыме программыште, «Мой первый шаг в науку» Юл кундемысе форумышто, «Пушкинские чтения» республикысе шан-че-практике конференцийыште, «Подрост» республикысе конкурсышто сеҥыше-влак радамыште лийынна, – ойла ӱдыр.
«Орлёнокышто» лиймыже Настян тӱняумылымашыжым эшеат кумдаҥден. Ӱдыр тушто «Летающие дроны на страже леса» курсым эртен. Дрон дене шкежат пайдаланаш тунемын.
– Мый журналист лийнем. Пӱртӱс, йырвел дене кылдалтше йодышым газет, радио я телевидений гоч келгын почын пуынем, – ончыкылык шонымашыж дене палдарыш Настя.
