Икшыве ача-авам ончен кушкеш. Нуно артист койышан улыт гын, мураш, кушташ кумылаҥеш, фермер семын тыршат гын, мланде пашалан шӱмаҥеш. Теве Волжский район Шӱргыял гыч Н.Н.Артемьев ден М.Ю.Тимофеева изинек спорт дене пеҥгыде кылым кучат. Давид эргыштат нунын корныштымак тошка. Нуно пырля тӱрлӧ таҥасымашке ушнат да сеҥышыш лектыт.
Ача-ава – спортсмен
Ача Николай Николаевич – тале ечызе. Учимсола школышто кугурак класслаште тунеммыж годым шке таҥаш да изирак ийготан ӱдыр-рвезе-влакым спортлан кумылаҥден. Футбол пасум, куржталме верым шкеак келыштарен. Баскетбол, волейбол дене модыктен. Школ деч вара физкультурым туныктышылан тунемаш пурен. Ава Марина Юрьевна тыгак ече дене талын коштын, Марий кугыжаныш университетысе футбол командын капитанже лийын. Тушто ӱдыр-влак модыныт. Тылеч посна туран лӱйкален, эсогыл парашют дене тӧрштен.
– Давид эргынан ныл ияш улмыж годым ечым пӧлекленна да таҥасымашке коштыкташ тӱҥалынна. Спорт еш семын, тыгак посна ятыр гана сеҥышыш лектынна. Игорь изамын София ӱдыржат ече дене кошташ, коньки дене мунчалташ кумылан. Ачаже – тале футболист да хоккеист. Кызытат шочмо ялжын чапшым арала, – ойла ава.
Поян еш архив
Шукерте огыл Марий Эл Республикысе «Эр вий» йоча да подростко-влак ушемын эртарыме «Мыйын еш архивем» республикысе конкурсыш ушненыт (снимкыште) да кумшо верыш лектыныт. Нуно тукым гыч тукымыш куснышо поянлык, усталык дене палдареныт. Кугезе кочашт Юрий Фёдорович Бакутов кумдан палыме сонарзе, лесник, егерь лийын. Пӱртӱсым аралымаште надырже кугу. Тыгай кумыл Давид ден аважлан куснен. Нуно кушкылын, вондерын, пушеҥгын, кайык-влакын ойыртемыштым, кушмыштым эскерат. Кертмышт семын аралаш тыршат. Тӱрлӧ акцийышке ушнат, шочмо верысе кумдыкышто шӱкым эрыктат, тӱзатат, шымлыме пашам возат. Ойыртемалтше сӱретым ужын, мотор фотом ыштат. Кугезе ковашт Анна Дмитриевна Тимофеева пӱртӱс поянлыкым чын кучылт мошташ туныктен. Шӱрым, тӱрлӧ когыльо ден салатым кызытат тудын рецептше почеш ямдылат.
– «Мыйын еш архивем» конкурсышто еш нерген вич фактым ойлаш кӱлын. Икымше – ме спорт дене пеҥгыде кылым кучена, спорт модыш дене модаш кумылан улына. Кокымшо – родо-тукым кылна пеҥгыде, еш йӱла тукым гыч тукымыш кусна. Кумшо – Шочмо элым йӧратена. Нылымше – пӱртӱс верч колянена. Визымше – таза илыш-йӱлам кучена. Нине шонымаш-влак еш, родо-тукым кокласе кылым вияҥдаш полшат, волгыдо ончыкылыкым сӧрат манын шонена, – ойлат ача-ава.
