21 ноябрьыште Татарстан Республик Кукмара районысо Уял школышто марий фольклор коллектив-шамычын «Марий сем» регион-влак кокласе фестиваль-конкурсышт эртаралтын. Тудын тӱҥ шонымашыже – марий калыкын поян тӱвыражым аралаш, вияҥдаш. Тушко Татарстан Республикысе Кукмара, Мамадыш, Балтаси, Агрыз районла, Марий Эл гыч усталык шӱлышан ӱдыр-рвезевлак погыненыт. Меат школна гыч шукын миенна да сеҥымаш дене пӧртылынна (снимкыште). «Сылнымут» таҥасыште Ксения Дмитриева, Аксар Мамаев, Максим Пименов сеҥышыш лектыныт. Нине ӱдыр-рвезевлак да тыгак Мария Игнатьева, Росина Иванова, Максим Яковлев, Варвара Дигина театрализованный представленийым ончыктеныт да икымше верым сеҥен налыныт. София Семёнова, Карина Васильева, Дарья Кириллова, Ольга Васильева, Елизавета Сидорова эн мастарын куштеныт да «Калык куштымаш» номинацийыште чыланыштым ончылтеныт. Тидлан нуно вуйлатышышт Светлана Валериановна Паниналан тауштат. Мый, «Кроссенс» технологийым кучылтын, «Марий Элемлан – 105» мастарлык классым ончыктенам. Тыгай йӧн йоча-влакым марий йылмым тунемаш кумылаҥда.
«Марий сем» фестиваль калык усталык пайремыш савырнен. Коча-кована-шамычын йӱлаштым самырык тукым мастарын ончыктен моштен да тӱвырана дене кугешнаш кажне еҥым таратен.
С.В.НИКИТИНА.
1-ше номеран Морко школ.
Фотом школ архив гыч налме.
