4 декабрьыште Йӱштӧ Кугызалан серышым возымо кече лийын. Йоча-влак У ий вашеш серышым ямдылат. «Шергакан Йӱштӧ Кугыза, идалык мучко мый тыршен тунемынам, ача-аван мутшым колыштынам…», – ӱдыр-рвезе-шамыч, тӱҥ шотышто, тыгай мутла дене пашаштым тӱҥалыт. Икшыве-влак юзо кочам эртыше идалыкысе сеҥымашышт дене палдарат да тудын деч пӧлекым вучат.
Диана ЯГОДАРОВА, У Торъял школ:
– Мый сӱретлаш моткоч йӧратем. Утларакше пӱртӱсым. Тӱрлӧ тӱсан фломастер, карандаш да скетчбук пеш лач лийыт.
Анна КАРПОВА, Курыкмарий , Микрӓк:
– Суртыштем кок попугай, кол-влак, пий да пырыс илат. Тений Йӱштӧ Кугыза деч эше ик пийым йодам. Шпиц ден мальтипу урлык келшат. Нуно изи, мотор да весела койышан улыт.
Евгений РЫБАКОВ, Оршанке, Кугунур:
– У ийлан вучымо пӧлек – пульт полшымо дене виктарыме машина. Тыгайлан кажне рвезе куана, шонем.
Оля МАЙКОВА мутланен.
Авторын фотожо-влак.
