Марий Элын Вуйлатышыже Ю.Зайцевын темлымыж почеш эртарыме «Марий кеҥеж» фестиваль республикыште кумдан палыме. Йоча-влакат рӱжге ушнат. Теве Звенигово район Красногорский посёлкын шочшыжо Кирилл Иванов икмыняр семӱзгар дене шоктен мошта. Гармонь, баян да аккордеон тудын лишыл йолташыже-влак улыт. Рвезе калыклан куан кумылым пӧлеклыме шонымаш дене шокта. Семла гоч колыштшо-шамыч деке шӱм-чон шокшыжым намиен шукта. Кирилл сымыктыш школышто чӱчкыдын сценыш лектеш, но чонжо эшеат кӱшкӧ чоҥешташ ӱжеш. Тудо «Марийское лето» уремысе фестивальын организаторышт деке выступатлаш йӧным пуаш йодмаш дене лектын. Икшывын усталыкшым шке семын шуараш кумылан улмыжо чылаштым ӧрыктарен. Тудлан, кужун шоныде, выступленийлан площадкым ойыреныт. Кирилл Йошкар-Олан рӱдӧ да Пресвятой Дева Мариян площадьлаште выступатлен. Очыни, семынже тургыжланен, но, тидым ончыктыде, кугу опытан артистла шкенжым кучен.
