Марий кундемын сылне пӱртӱсшым еш дене ончен кошташ пеш йӧратена. Ты гана Карман курыкыш миенна. Ярослав тукым шольымымат пырля налынна. Снимкыште коктын улына. Кӱзаш тӱҥалме годым акам тӱрлӧ кушкыл дене палдарен. Йошкар книгаш пуртымо икмыняр пеледышымат ужынна. Куткышуэже мыняр шуко?! Южыжо мыйын кӱкшыт лиеш ала-мо. Ошкылаш куштылгыжак огыл ыле гынат, Карман курыкын эн кӱкшака верышкыже кӱзен шуынна.
Артём ИВАНОВ.
Йошкар-Ола, 24-ше №-ан школ.
