Волжск оласе лицейын выпускникше Вадим Тарасов пӱртӱс коклаште лияш изинек йӧрата. Верысе Экологий рӱдерыште шинчымашыжым келгемдымеке, шымлымаш пашам, проектым возаш кумылаҥын. «Живой мир» ушемым вуйлатыше М.В.Мичукова тӱрлӧ каҥаш дене полшен. Вадим «ЭкоЛето», «Человек, природа, техника» республикысе конференцийлаште, «Белая берёза» всероссийский конкурсышто да моло вере сеҥыше лийын. Экологий дене районысо олимпиадыште эре кӱкшӧ лектышым ончыктен. Чолга рвезе «Подрост» всероссийский конкурсын «Экология лесных растений» таҥасыштыже икымше верым налын. Ямдылыме пашаже Волжск олаште кушшо да Йошкар книгаш пуртымо кушкыл-влак нерген лийын. Тыгайжым шым кушкылым вашлийын. Оласе калык нине кушкыл-влакын кушто кушмыштым палыже манын, «Яндекс.Картыште» интерактивный картым ямдылен.
– Экологий – шанче пӧрт – ойла Вадим. – Тудым эре шымлыме, сайынрак пален налме шуэш. Сандене ончыкылык илышемым ты шӧрын дене кылдаш кумылан улам. Озаҥ оласе природопользований да экологий институтыш тунемаш пураш шонем.
