Яндар кас каваште шӱдыр-влакын почепоче волгалтмыштым шекланенда, очыни. Нунын чотышт минут еда шукемеш. Йӱд кава тымыкын коеш гынат, тушто эреак тӱрлӧ кончыш лиеда. Мемнан кундемыште мом, кушто да кунам ужаш лиеш? «Планета ИКС» астрономический клубын вуйлатышыже Константин Соловьев ты да моло йодышлан вашешта.
– Йӱд кавам кузе эскерыман?
– Пӱсӧ шинчан улыда гын, ӧрыктарыше ятыр кончышым ужаш лиеш. Кычалаш куштылгырак лийже манын, лӱмын келыштарыме приложенийым телефонышко шынден кертыда. Тудо тыланда компас семын шӱдырым але планетым муаш полша да шкешт нерген палдара. Астрофотографийым ышташ тунемаш лиеш: кызытсе телефонлаште профессиональный съёмко режим дене тидым ышташ йӧн уло. Эскерашда лач ик мешанчык лектын кертеш – игече. Сандене игече могай лийшашым ончылгоч шергалман.
– Мемнан кундемыште могай кончышым эскераш лиеш?
– Тылзын вашталтмыжым, Кайыккомбо корным, тӱрлӧ шӱдырым, йӱдвел тулым да тӱнямбал космический станцийын чоҥештымыжым идалык мучко эскерен кертыда. Пагыт дене ойыркалаш гын, шошым Меркурийым да Лириды метеор йогыным, кеҥежым ший пылым да Персеиды метеор йогыным, шыжым Тылзе петырнымым, телым Геминиды метеор йогыным ужаш лиеш. Тыгак у кометым але метеоритым шекланаш йӧн уло. Каваште нунын волгалташ тӱҥалмыштым ончылгоч шижтараш ок лий, сандене интернетыште чын уверым шекланыза.
Пӱртӱс кончыш деч посна тӱрлӧ ракете-шамычын чоҥештымыштым ончаш пеш оҥай. Кызыт шуко агентстве трансляцийым эртара, но южыжын чоҥештымыжым мемнан кундемыште шке шинча дене ужаш лиеш. Йӱд кавам эскерен, ала теат астрономий деке кумылаҥыда?
Катя СЕРГЕЕВА мутланен.
Фотом еш архив гыч налме.
