«Патриотическая азбука глазами детей» ончерым 9 майыште Йошкар-Олаште «Герои Отечества» тоштер-патриот рӱдерыште почыныт. Тудым рӱдоласе 1-ше номеран школышто 10-шо классыште тунемше кандаш чолга ӱдыр ямдылен.
– Шкешотан азбукым март гыч май марте чумыреныт. Кажне буквалан патриот теме дене кылдалтше мутым кычалыныт. Мутлан, «А» – Александр Матросов, «Г» – Николай Гастелло. Талешке-влакын илыш корныштым шымленыт, подвигыштым палемденыт. «Д» буква Ленинград оласе блокаде дене кылдалтын, тудым «Дорога жизни» манын лӱмденыт. Сӱрет-влакымат шке келыштареныт. Калык фронтын сӱретчыже Владимир Николаевич Коптелин тӧрлен, – ойла Йошкар-Оласе 1-ше номеран школ директорын воспитаний шотышто советникше Диана Анатольевна Тихонова.
Ӱдыр-влакын пашаштым ончаш вашкыза. Ончер май мучко кумылан-влакым вуча.
Оля МАЙКОВА.
Фотом Марий Элысе Образований да науко министерствын «ВКонтакте» воткылысе тӱшкаж гыч налме.
