Йоча-влак, те кузе шонеда? Ече дене кошташ йӧратыше-влак кеҥежым капкылыштым кузе шуарат? Вашмутым иканаште палышда, очыни. Куржталыштыт, ечероллер дене коштыт. Звенигово район Шолэҥер школын 9-ше классыштыже тунемше Полина Петрова (снимкыште) спорт дене кылым куд ияшыж годым кучаш тӱҥалын. Изи ӱдыр, изажын медаль ден кубокшо-шамычым ончен, тудын гай тале спортсмен лияш кумыла ҥын.
– Школыш тунемаш кайымеке, ече дене кошташ тӱҥалынам. Тренер Нестер Арсентьевич Александров вий-куатем шижын, кумылаҥден моштен. Кокымшо классыште тунеммем годым Звенигово олаште эртаралтше ече дене районысо таҥасымаште икымше верым налынам. Тиде мыйын икымше сеҥымашем лийын да умбакыже шуаралташ вийым ешарен, – ойла самырык спортсмен. – Ече дене кошташ куштылгырак. Лум ӱмбалне чоҥештен кайымыла чучеш. Ечероллер дене кошташ вий утларак кӱлеш.
Полина тренировкылан кажне кечын ик-кок шагатым ойыра. Сеҥымашыжат ятыр. Эн куандарышыже – биатлон дене Марий Эл Республикын да Йошкар-Олан первенствышт икымше вер. Ечероллер дене Марий Эл Республикын чемпионатыштыже шке ийготан-влак коклаште икымше верым шукерте огыл сеҥен налын.
