Школлаште дистанционный тунеммашке куснымеке, шуко шочшан, начар илыше ешласе йоча-влак нелылыкыш логалыныт: икшыве-влаклан компьютер ок сите. Адакшым ешыште 9-ше да 11-ше класслаште тунемше-влак улыт гын, йӧндымылык утларак шижалтеш. Тыгай еш-влаклан полшаш шонымаш дене Россий мучко «Помоги учиться дома» акцийым увертарыме. Тудо сентябрь марте шуйна.
«ПС Софт» IT-компанийын ассоциацийже Марий Эл Республикыште акцийышке ик эн ончыч ушнен. Шуко шочшан ешыште кушшо 9 икшывылан компьютерым пуэн. Тыгай пиал Оршанке кыдалаш школышто тунемше, шуко шочшан еш гыч Анна Беляковалан (снимкыште) логалын. Анна «4» ден «5»-лан тунемеш. ОБЖ, физкультур да марий йылме дене районысо да республикысе олимпиадылаште шинчымашыжым терга. Спорт дене пеҥгыде кылым куча: «КЭС-БАСКЕТ» районысо конкурсышто сеҥыше лийын.
Анна тыгай пӧлеклан кугу таум ойла.
