Еш идалыклан пӧлеклалтше «Всей семьёй» всероссийский проект нерген палыдыме еҥ укеат, очыни. Тудын нерген чӱчкыдын интернетыште возышт, газетлаште савыктышт, телевиденийыштат ончыктышт. Куандара: проект шуко ешын кумылжым савырен. Нунын кокла гыч иктыже – Йошкар-Олаште илыше Никоновмыт еш.
Мужыр пелаш Валентина Геннадьевна ден Михаил Юрьевич Кужэҥер район Визым ялыште шочын-кушкыныт. Нуно ик классыште тунемыныт. Жап эртымеке, вуешшушо самырык ӱдыр ден рвезын чоныштым йӧратымаш тул авалтен. Вашла йӧратен, пагален илымыштлан тений августышто 21 ий темеш. Коктынат пашалан кожмак улыт. Валентина Геннадьевна тӱрлӧ пашам ыштен ончен: няне, кассир, парикмахер лийын, но чонжылан эн лишыл ургымаш паша. Кум ий наре тудо ургызылан ышта. «Тиде сомыл мыланем куаным конда, нойымымат ом шиж», – ойла В.Г.Никонова. А Михаил Юрьевич кӱртньӧ омсам ыштымаште тырша.
Йоча – еш эҥертыш
Никоновмытын тӱҥ эҥертышышт – кок ӱдырышт ден ик эргышт. Кугурак ӱдырышт, Валерия, Йошкар-Оласе торгово-технологический колледжым тунем пытарен, кызыт кассирлан пашам ышта. Тунемме пагытыште сӱретлаш, кушташ коштын. Кызытат тӱрлӧ кидпашалан шӱман. Максим Йошкар-Оласе кумшо номеран школышто визымше классыште тунемеш. Ончыч футболла модын да бассейныш коштын гын, кызыт дзюдо дене пеҥгыде кылым куча. Ксюша ты школыштак кокымшо классыште шинчымашым пога. Ондак акаже семынак куштен, кызыт сӱретлаш кумылан да пидаш тунемеш. Ача ден ава икшывыштлан эре полшат. Школысо конкурслаш ушнаш манын, поделкым пырля ыштат, сӱретлат, чӱчкыдын ончыл верыш лектыт. Моло мероприятийыштат шкеныштым устан ончыктат. Чолга еш семын ик гана веле огыл пӧлек дене палемдалтыныт.
Яра жапым пайдалын эртарат
Паша – паша дене, но ешлан поснак кугу тӱткышым ойырыман. Никоновмыт пӱртӱсыштӧ еш дене канаш йӧратат. Кеҥежым нунылан эҥер вӱд воктен лияш утларак келша. «Пӱртӱс деч вийым налына. Паша да мӧҥгысӧ сомыл нерген шонымашым ик жаплан ӧрдыжкӧ шӱкалын, пырля улмылан йывыртен, ракатланен канена. Пошкудо регионлашкат кошташ келша. Казаньыште, Чебоксарыште, Нижний Новгородышто лийынна. Ола-влакым онченна, коньки дене коштынна, зоопаркыште да моло оҥай верыште лийынна. А ӱмаште пелашем дене пырля икымше гана Шем теҥызыш миенна. Туштат мыланна моткоч келшен», – ойла Валентина Геннадьевна.
Проект сымыстарен
«Всей семьёй» проектыш Валентина Геннадьевна ден Михаил Юрьевич икшывышт дене пырля чолган ушненыт, чыла заданийым кумылын шуктеныт.
– Проект нерген уверым интернетыште ужынам. Кумыл лийын, но ала лектеш, ала уке шонымаш чаракым ыштен, – палдара озавате. – Садлан иканаште ушнен огынал. Икмыняр жап гыч Ксюшан класс вуйлатышыже Е.Л.Макарова «Всей семьёй» нерген ойлыш да ушнаш темлыш. «Те чолга улыда, те кертыда» шомакла дене кумылаҥдыш. Декабрьыште ме кожым рӱжге сӧрастарышна, вара моло заданийым шуктышна. Проект еш дене шукырак жапым пырля эртараш таратен, икте-весе кокласе кылым эшеат пеҥгыдемден. Организатор-влаклан тыгай оҥай да ойыртемалтше проектым эртарымыштлан, а Елена Леонидовналан ушнаш таратымыжлан кугу таум ойлена. Тек кажне еш пиалан лиеш.
