«Келшымаш тулото» ты гана Виче кундемысе Малмыж олаште эртаралтын. Марий Эл Республикысе Марий Турек, Татарстан Республикысе Балтаси да Виче кундемысе Малмыж районла гыч ӱдыр-рвезе-влак 56-шо гана иквереш погыненыт. Кум пошкудо районышто илыше тӱрлӧ калыкын икшывыже-влак 1966 ий 29 майыште икымше гана тыгай вашлиймашым эртареныт. Тиде поро йӱла кызытат шуйна. Йоча-влак пашашт дене палдареныт, спорт модмаште писылыкыштым тергеныт, тулото воктене пайремын гимнжым йоҥгалтареныт.
