Тиде кайык пӧртым рушлаже «синичник» маныт. Тудо изирак кайык-влаклан келыштаралтеш, мутлан, кисалан. Технологийым туныктышо А.С.Григорьевын вуйлатымыж почеш тыгай киса пӧртым школышто ыштенна. Эн ондак оҥа пӱчкыш-влакым ямдыленна. Ик оҥа покшелан рожым шӱтенна. Вара моло ужашлам иквереш чумыренна. Пушеҥгыш пижыкташ манын, изи пӧртын шеҥгекыже кужу рейкым пудаленна. Ямде синичник-влакым чодырашке наҥгаен сакаленна. Поро пашалан «Юный лесовод» школ лесничествын кружокыштыжо (вуйлатыше З.К.Митрофанова) кумылаҥынна. Шулдыран йолташна-шамыч сад-пакчанам шукш-копшаҥге-влак деч аралаш тӱҥалыт манын шонена.
Максим СТЕПАНОВ.
Морко, Унчо.
