Марий самырык театрын шындыме спектакльлаште самырык артистке Кристина БИРЮКОВАМ чӱчкыдын ужаш лиеш. Кристина Шернур район Тамшэҥер ялеш шочын-кушкын. Лажъял школым тунем пытарымеке, И.С.Палантай лӱмеш тӱвыра да сымыктыш колледжыш артистлан тунемаш пурен. Театрыште нылымше ий пашам ышта.
– Кристина, артист лияш шонымаш кунам шочын?
– Мый изи годсек артист лияш шоненам. Ачам мураш йӧрата. Мыят изинек тудын пелен мурым муренам. Школышто тунеммем годым почеламутым лудаш келшен. Ялысе клуб пеленысе куштымо кружокыш коштынам. Шарнем, 9-ше классыште тунеммем годым «Шыже бал» пайремыште сценкым ончыктенна. Тушто мый шоҥго кочан рольжым модынам. Ачамын ужгажым, портышкемым чиенам, ӧрышым пижыктенам. Изи годсо шонымашем шукталтын. Кызыт йӧратыме пашам ыштем.
– Тыйым чӱчкыдын йомакыште ужаш лиеш. Йомакысе геройым модаш мо дене оҥай?
– Мый йомакыште модаш моткоч йӧратем. «Жила-была Сыроежка», «Гадкий утёнок», «Мяуля и Пикуля», «Мойдодыр», «Театр Розового Слона», «Каза, Тага да Пырыс», «Наш друг – светофор» да моло йоча спектакльыште модам. Лудын, ™йвоҥгын, Ша-поклякын, Мочалкын, Рывыжын, Пийын образыштым чоҥем. Мыланем Рывыжын рольжым модаш утларак келша. Йома-кыште мастарлыкым тӱрыснек почын пуаш лиеш манын шонем.
– Тыланет мо тыгай театр? Кӧ тыгай актрисе?
– Театр мыланем кокымшо сурт гай. Ме тӱрлӧ герой-влакын илышышт дене илена. Калыклан куаным кондышаш да шке пашанам йӧратышаш улына. Тунам гына лектыш лиеш. Образ-влак полшымо дене калыкым молан-гынат туныктена, шонаш таратена.
