1 сентябрьыште кажне школышто йыҥгыр йӱк йоҥалтеш. Теве «Марий Эл» увер агентствысе «Кугарня» газетын редакторжо Елена Годунован София ӱдыржӧ (снимкыште) икымше классыш кая.
Пайрем ятыр йочалан пырля тунемме йолташ-влак, йӧратыме туныктышо дене вашлиймашым сӧра, йочасад деч вара школышко икымше гана толшо ньога-шамычлан шинчымаш тӱняш омсам почеш. Нунылан чылажат у, палыдыме. Ты кечын ача-ава-влак поро сугынь дене икшывыштым парт кокла марте ужатат.
София Годунова – «Ямде лий» газетын поро йолташыже. Тудо савыктышым пала, лудеш, редакцийышкат уналыкеш толаш кумылан. Пеленже сӱретым конда. Пашажым газет лаштыклаште икмыняр гана эскерен кертында.
– Тений мыят тунемше-влак радамыш ушнем. Медведево посёлкысо 3-шо номеран школышто 1-ше «А» классыште тунемаш тӱҥалам. Туныктышем – Елена Александровна Крыжановская. Ты татым чон вургыж вучем, школлан ямде улам, – ойла ӱдыр.
Елена Годунован фотожо.
