Степан изам шошым Моско олаште эртаралтше «Эр кечыжын эр лекмыж дене» марий фольклор ден тӱрлан пӧлеклалтше усталык вашлиймашке миен. Тудлан кугу олаште шочмо йылме дене мурым колышташ да марий калык дене вашлийын кутыраш кугу пиал лийын. Тыгай мероприятийым кеҥежым Марий Элыште пӱртӱс лоҥгаште эртараш шонат манын ойлымыжо ушеш кодын. Юлсер кундемыште вашлиймаш лийме нерген уверым ужмеке, моткоч йывыртенна. Пӧтъял кундем Азьял черке деч торасе огыл кӱкшака верыште марий мурым колыштмым нимо дене оттаҥастаре. Ныжыл сем йоҥга, мурызын яндар йӱкшӧ шергылтеш. Коҥгаште тул коеш, шӱрашан мелнан пушыжо нерым чыгылта. Самоварыште шудо чай шолеш. Йомак тӱняшке логалмыла веле чучеш.
Уста мурызо, туныктышо, фотограф Линда Николаеван йӱкшым нимучашдымын колыштмо шуэш. Тошто марий семӱзгар дене шоктышо Иван Каменщиковым чарныде ончаш лиеш. Тыгак тудын ачаже, Анастасия пелашыже, изи ӱдырышт, тӱрлызӧ Эчан Иванов дене палыме лияш пеш куанле ыле.
Пайремыш Марий Элын тӱрлӧ кундемже, Озаҥ ола гыч толыныт. Мурызо Татьяна Денисовам ужмыжак мом шога. «Яндар-яндар» мурыжо чонешак логале. Пӱртӱс лоҥгаште мурым колыштын, кече шичмым эскерен, вий-куатым налат. Шарнымаш чоным идалык мучко ырыкташ тӱҥалеш, шонем. Тек «Акрет» проектын ӱмыржӧ кужу лиеш.
Марина СТЕПАНОВА.
Волжский, Упшер.
Фотом еш архив гыч налме.
Снимкыште: Марина — Л.Николаева ден И.Каменщиков дене пырля.
