29 мартыште Республикысе курчак театрыште олыкысо мотор пеледыш коклаш логалмыла чучын. Тушто «Пеледше тукым» республикысе йоча усталык конкурс эртаралтын. Ты мероприятий йочасадыш коштшо-шамычым кок ийлан ик гана пырля чумыра. Тений «Пеледше тукым» Еш идалыклан пӧлеклалтын. Конкурсышко Йошкар-Оласе да республикнан 12 районысо 27 йочасад гыч 173 ӱдыр-рвезе ушнен. Иктыже весыж деч мотор да сӧрал мурымашым але куштымашым ямдылен. Тидыже воспитательын да йочасадысе моло пашаеҥын лектышыже.
Ӱдыр-рвезе-влак кум номинацийыште: «шкетын мурымаш», «ансамбль дене мурымаш», «ансамбль дене куштымаш» – таҥасеныт. Куд-шым ияш йоча-шамычын марла муралтымышт, сылне сем почеш кушталтымышт кажнын чонжым савырен. Йошкар-Оласе 65-ше номеран «Незабудка» йочасадын воспитанникше-шамыч эҥер сер воктене кол кучымашым, ӱдыр-влак дене модмашым ойыртемалтшын куштен ончыктымышт дене сеҥыше лийыныт.
– Тиде номерым ме ныл кече жапыште тунемынна. Кол кучымашым ончыктена гын, кузе эҥыр деч посна? Рвезе-шамычлан эҥырым, а ӱдыр-влаклан марий тӱран корзиҥгам ямдыленна, – ойла «Незабудка» йочасадын музыкальный вуйлатышыже Н.В.Кудрявцева. – Пырля пашам ыштыше-влаклан кугу таум ойлем. Тыгай мероприятийлан кӧра йоча-шамыч шкеныштым сценыште кучаш тунемыт, весе-влакым ужыт, ум пален налыт. Сеҥымаш кеч-кунамат куаным конда.
«Соло» таҥасыште «Авай» мурым йоҥгалтарымыж дене Дина Алмаматова (Медведево, Кузнецово селасе «Улыбка» йочасад) икымше верым сеҥен налын. Тудым снимкыште ужыда. «Ансамбль дене мурымаш» таҥасыште ончыл верыш Марий Турек посёлкысо «Берёзка» йочасадын вокал ансамбльже «Ешем» муро дене лектын.
В.МАМАЕВА.
Авторын да Р.Николаеван фотошт.
