Шымлыме пашам эртарыме годым тӱрлӧ книгам, газетым, журналым, архивысе материалым шергалат. Шуко ум пален налат. Тыге йылмын сылнылыкшым шижаш тунемат. Советский район Ӱшнӱр школын 11-ше классыштыже тунемше Люда ГРЕБНЕВА, филологий шанче доктор, профессор, Марий Элысе шанчын сулло пашаеҥже А.Н.Куклин нерген шымлыме пашам тыгай шонымаш дене возымеке, марий йылмын, марий шомакын вийыштым утларак умылен.
– Анатолий Николаевич ятыр чапле книгам возен. Шанче пашаже-влакым шотлен от пытаре. Марий йылмым вияҥдымашке кугу надырым пыштен, – ойла ӱдыр.
Людан марий йылмым палымыже марий сылнымут дене кылым кучаш тарата. Марий литератур дене олимпиадыште шинчымашыжым терга. Республикысе олимпиадыште кок гана сеҥыше радамыш лектын. Туныктышыжо З.А.Волковалан кугу таум ойла.
