Марий калык вургемым тӱткын ончет гын, тудым книга семын лудаш лиеш. Йошкар шӱртӧ дене тӱрлымӧ тамга вургемын озаж нерген ятыр увер дене палдара. Медведево район У Арбан кыдалаш школышто тунемше Варвара Широкова (снимкыште) школ пеленысе тоштерыште аралалтше тӱрлӧ тувырым «чийыше» курчак-влакым ужмеке, нунын ойыртемышт нерген утларак пален налаш кумылаҥын.
– У Арбан школ пеленысе тоштер кок пӧлеман. Иктыштыже тӧнежын эртыкше, чапланыше тунемшыже-влак нерген увер-шамыч аралалтыт, кокымшыжо калык дене палдарыше экспонат-влаклан поян. Марий тувыран курчак-шамыч поснак ойыртемалтыт. Тудым краеведений кружокым вӱдышӧ Людмила Аркадьевна Яндыганова «Иглой рисует красоту» ончерыш чумырен. Тувыр тӱрлӧ – тошто сынанат, тачысе кечылан келыштарымат, – ойла Варвара.
Ӱдыр марий калык вургем нерген ятыр уверым тоштерыште пален налын. Книгагудышто, интернетыште кычалын, кугыеҥ-шамыч деч йодыштын. Иктешлымашыжым «Курчак-влак мо нерген туштат?» шымлыме пашаште возен коден. Вуйлатышыже – Л.А.Яндыганова.
– Ончыч эрвелмарий-влак ош куэм гыч тувырым ургеныт гын, жап эртымеке, тыгыде клетканым кучылташ тӱҥалыныт. Курыкмарий тувыр тӱрлӧ тӱсан тасмалан да шерлан поян. Олыкмарий-влакым ончалаш гын, кажне район ден округышто тувыр шкешотан, ӱдырамаш-шамычын вуйчиемышт ӧрыктарыше. Йӱдвел-эрвел могырышто илыше-влак вуйышкышт шымакшым шынденыт, Йошкар-Ола, Медведево, Оршанке могырым – сорокам, Моркышто, Звениговышто, Волжскийыште – шарпаным (нуным эше шарпанан-нашмакан марий маныт). Тоштерыште аралалтше ик курчакын вуйыштыжо – шурка. Тудо ик эн тоштылан шотлалтеш. А самырык-влаклан чаравуя кошташ лийын, – палдара ӱдыр.
Шымлыме пашаж дене Варвара «Малые Евсеевские чтения» регион-влак кокласе шанче-практике конференцийыш ушнен да 3-шо вер дене палемдалтын.
Оля МАЙКОВА.
Фото-влакым школ да еш архивла гыч налме.
