Эртыше каныш кечыште Медведево район Кугу Шап ялыште «Невозможное возможно» ойыртемалтше издер-влакын республикысе конкурсышт кокымшо гана эртаралтын. Таҥасымашке Марий кундемна деч посна Виче кундем да Ульяновск ола гыч кумылан-влак ушненыт.
15 командылан мастарлыкым ончыкташ, кугу курык гыч мунчалтен волаш кӱлын. Кажныже, тӱрлӧ материалым кучылтын, издерым сӧрастарен, сылнылыкым пурташ тыршен. «Эн ойыртемалтше издер» таҥасыште Йошкар-Оласе 23-шо номеран школышто тунемше-влакын «Бешеные кокосы» командышт (снимкыште) тӱҥ призым сеҥен налын. Нуно шокшо кундемым ушештарыше издерым ыштеныт да «ВАЗ-папуас» лӱмым пуэныт. Йошкар-Ола гыч Коренковмыт еш (снимкыште) мунчалташлан икшывыштын кроватьыштым келыштарен. Нуным «Калыкын симпатийже» таҥасыште палемденыт.
Авторын да М.СКОБЕЛЕВЫН фотошт.
