Дарья Сайранова Пошкырт кундем Балтач район Токтай ялеш шочын-кушкын. Кызыт Мишкан ялыште ила да Иванай школышто 9-ше классыште тунемеш. Изиж годсек сӱретлаш кумылан. Яра жапыште ялысе пӱртӱсым, лишыл еҥже-влакым сӱретла, чонышто мо ышталтмым лач кагазыш луктын пышта. «Шукыж годым изирак кугытан сӱретым ыштем, вет тудо шагалрак жапым да вийым налеш», – ойла Дарья. А эше ӱдыр фотосӱретым ышташ йӧрата. Ятыр фотожо, жап эртымеке, сӱретыш савырна.
Дарья Сайранован сӱретше-влак шукыштым ӧрыктарат. Пашаж дене районысо конкурслаште чӱчкыдын ончыл верыш лектеш. Пошкырт кундемыште илыше марий ӱдыр тыгак мураш-кушташ кумылан. Чолгалыкшым «Ош пеледыш» ансамбльыште ончыктен. Ансамбльыш коштшо йолташыже-влакым сӱрет гоч ончыктымаш чылалан чапле пӧлек лийын, шарнымашеш кодын.
