«Таче калыкемын чонжо куштылемын,
Йӱр почеш рӱзалтше тумерла гаяк.
Мурыжат весемын, умыр куштылемын,
Юарлалтше йӱкла толкыналт кая».
В.Х.Колумбын сылнымут корнылаже кажне еҥым шонкалаш таратымыже дене ӧрыктара. Поро йӱлаш савырныше «Колумб лудмаш» регион-влак кокласе сылнымут пайремыш калык ий еда лыҥ погына. Тений тудо марий сылнымутын кум мастаржылан – С.Г.Чавайнын 135 ияш, В.В.Крыловын 70 ияш лӱмгечыштлан, В.Х.Колумблан – пӧлеклалтын да Морко район Чавайнурышто эртаралтын. Почеламутым сылнын лудаш, мурым мураш йӧратыше шӱдӧ наре йоча ден кугыеҥ сценыште мастарлыкыштым ончыктеныт. Ӱдыр-рвезе-влак У Торъял, Морко, Кужэҥер, Медведево районла, Йошкар-Ола, Татарстан кундем гыч погыненыт. Сылне муро сем кумылым нӧлтен, тӱрлӧ площадкыште паша шолын. Йоча-шамыч, ик вере марий семӱзгар дене палыме лийын, шокташ тунемыныт гын, вес вере книгам шергалыныт, викториныште уш-акылыштым тергеныт. С.Г.Чавайн лӱмеш сылнымут да этнографий комплексыште пайдале экскурсий эртаралтын.
Жюрин еҥже-влак конкурсант-шамычым литератур да муро таҥаслаште акленыт. Снимкыште 1-ше номеран Морко школышто тунемше Ксения Дмитриевам, 2-шо номеран Морко школ гыч Регина Григорьевам, Йошкар-Оласе И.С.Палантай лӱмеш тӱвыра да сымыктыш колледжын Национальный сымыктыш гимназийыштыже тунемше Татьяна Дубининам да Коркатово лицей гыч Яна Дементьевам ужыда. Ӱдыр-влак тӱрлӧ таҥасыште икымше верым налыныт.
– Шочмо йылмына моткоч поян да виян. Ме йылмын куатшым шижын моштена, марий улмына дене кугешнена. Кумдан палыме поэт-влакын почеламутыштым лудынна, шке возымынам аклымашке луктынна. Илен-толын, мемнан коклаште тале сылнымутчо лиеш манын шонена. Валентин Колумб гай йӱлышӧ шӱдыр марий тӱняште шуко лийшаш, – ойлат ӱдыр-шамыч.
