Шочмо кундем нерген марий поэт-влак ятыр почеламутым сереныт. Василий Элмарын «Мый йӧратем родной элемым» почеламутшым кажне тунемше пала, шонем. 2 ноябрьыште, Марий Эл Республикын шочмо кечыже вашеш, Йоча да самырык-влаклан В.Колумб лӱмеш книгагудышто лач тыгай лӱман республикысе лудмаш конкурс эртаралтын. Тӱрлӧ кундем гыч толшо ӱдыр-рвезе-влак, шочмо кундемыштым моктен, почеламутым марла да рушла лудыныт. Мый марий йоча-шамычым колыштынам, артист мастарлыкыштым акленам. Тений шукынжо Советский, Медведево районла да Йошкар-Ола гыч лийыныт. Тунемше ден студент-шамыч утларакше Лидия Иксанован, Василий Крыловын, Иван Осминын, Семён Вишневскийын почеламутыштым лудыныт.
1-4-ше классла коклаште Медведево район Арбан школын тунемшыже Драгояр Янаев В.Элмарын «Мый йӧратем родной элемым» почеламутшо дене сеҥышыш лектын. 5-9-ше класслаште тунемше-влак коклаште Медведево район Туршо школ гыч Екатерина Иванова М.Емельяновын «Толза мемнан деке» почеламутшо дене чыланыштым ончылтен. Кугурак клас-слаште тунемше ден студент-шамыч коклаште Йошкар-Оласе Торгово-технологический колледжын студенткыже Виктория Иванова С.Вишневскийын «Марий Элем» почеламутшо дене ойыртемалтын. Ӱдыр-рвезе-влаклан дипломым да чапле пӧлекым кучыктеныт. Нуным снимкыште ужыда. Марий Эл нерген ятыр пашам колыштын, шочмо кундемыштым утларак йӧраташ кумылаҥыныт, шонем.
«Ямде лий» газет деч кумылаҥдыше пӧлекым Советский район Шуарсола школышто тунемше Алина Александровалан кучыктымо.
