Кажне еҥлан шочмо йылмыже эн лишыл да шерге лийшаш. Чаманен каласыман, кызыт шуко йоча шочмо йылмыжым пала гынат, тудын дене огеш мутлане. Ӱдыр-рвезе-влакым шочмо йылмышт деке шӱмаҥдаш манын, руш, одо да англичан йылмылам туныктышо, кусарыше, йоча книган авторжо Лариса Широбокова «Книжный сундучок» проектым илышыш шыҥдарен. Йоча-влак мультфильмла, книгала полшымо дене шочмо йылмышт дене шомаклам пален налыт, мутланаш тунемыт. Эн ондак автор книгам рушла возен, вара тудым одо йылмыш кусарен. Икмыняр жап гыч моло финн-угор йылмышкат кусараш шонымаш лектын. Шукерте огыл марий йылме дене книга ош тӱням ужын. Кусарыме сомылым Марий Элын шочшыжо, кызыт Венгрийыште илыше Ирина Каменщикова (снимкыште – Марк эргыж дене пырля) шукта.
– Ты проект кышкарыште тӱрлӧ йылме дене 7 пособий ямде лийшаш. Вичкыж книгалашке интерактивный сюжетым, тӱрлӧ теме дене кылдалтше предложений ден сӱрет-влакым пуртымо. Мутлан, «Мый сӱретлем» книгам чиялташ кучылташ лиеш. «Кандыра» книга почеш кид йымалне улшо материал гыч модышым келыштарыман. «Айда пырля модына» книгаште капкылым вияҥдыше тӱрлӧ модыш дене палдарыме. Книга-влак почеш йӱкан фильм ышталтеш. Текстым лудаш веле огыл, колышташат йӧн уло, – ойла Ирина.
– Книгам ямдылыме годым мом шотыш налыда?
– Икымше – куштылго мут-влакым кучылтына. Кокымшо – книган сюжетше йочан ийготшылан келшышаш. Тыгак шарныман, йоча пелен ача-ава, коча-кова але вес лишыл еҥ лиеш гын, лектыш эшеат куандара. Йӱкын пырля лудмашын пайдаже моткоч кугу. Икшывылан куштылго лийже манын, текст-влак кӱчык предложенийла гыч шогат. Предложенийым але мут-влакым шарнен кодашлан шаблон-шамычым ямдылыме. Эн тӱҥжӧ – йочам марий книга деке шӱмаҥдаш.
– Ты пашалан пижаш мо кумылаҥден?
– Мыйын кок изи икшывем уло. Венгрийыште илена гынат, кугурак эргым дене шочмыж годсек марла мутланем. Кушмыжо семын руш йылме денат книгам лудаш да мультфильмым ончаш тӱҥалынна. Чаманен каласыман, марла мультфильм пеш шагал. Сӱретан книгалам шергалаш, лудаш йӧратена. Ларисан тыгай книга-влакым ончыктымекыже, марий йылмыш кусараш шонымыжым каласымекыже, мый полшаш вигак келшенам.
– Тыгай книган кӱлешлыкше могай?
– Ты сӱретан книга йӧршеш у форматан. Тудо йочан психикыжым шотыш налын возалтын. Садлан икшывылан поснак оҥайын да ойыртемалтшын чучын кертеш. Йочалан могай книга келша, мо оҥайын чучеш гын, жапым чаманыде, пеленже шичман да йӱкын лудман. Уэш-пачаш лудаш йодеш гынат, йодмыжым шуктыман. Марий йылмым йот йылме семын тунемше-влаклан книга кугу полышым пуа. Ӱшанен кодына, сӱретан книгана-влак йоча, ава-ача, туныктышо-шамычланат куаным да пайдам кондат.
