Марий рвезе виян, патыр, лӱддымӧ лийшаш манмым чӱчкы дын колына. Тылеч посна тудо мунло шонымашыжым тичмашын, раш да чаткан ойлен моштышаш. Тидлан лудмаш конкурс-влак моткоч полшат. Теве 1-ше номеран Морко школышто 9-ше классыш вончышо Максим Пименовын (снимкыште С.В.Никитина дене пырля) сылнымут произведенийым лудмыжым колышт шерет ок тем!
Максим марла изинек яндарын мутлана. Морко посёлкышто илыше Никитинмыт ешышке илаш куснымекыже, талант памашыже утыр шолаш тӱҥалын. 2022 ий гыч тӱрлӧ конкурсышто мастарлыкшым терга. Районышто эртаралтше ик сылнын лудмаш конкурсымат ок кодо, манаш лиеш.
— Марий йылме — тӱняште ик эн сӧрал, ныжылге йылме. Марла почеламутым лудмо лышташын лывыргын тарванылмыжым я памашын йоргыктен йогымыжым ушештара. Сылнын лудаш моткоч йӧратем. Тӱрлӧ конкурсым увертарыме нерген авам Наталья Вячеславовна але марий йылмым туныктышо София Васильевна Никитина ойлат. Лудмаш конкурслан произведенийым туныктышем моштен ойыра. Вара пырля сылнын каласкалаш тунемына, шуко ямдылалтына. Сеҥышыш лектамат, моткоч йывыртем. Авам ден туныктышемлан тауштем, — ойла рвезе.
М.Пименов Казаков, Колумб, Апакай, Чавайн луд машлаште ятыр гана ончылно лийын. «Самырык тукым» республикысе йоча усталык конкурсышто «Сылнымут да сем композиций» таҥасыште сеҥышыш лектын.
— Тӱҥалтыште сценыш лекташ лӱдмашан ыле. Тургыжланенам, шӱмем чот кӱлткен. Почеламутын шонымашыже колыштшо дек миен шужо манын, чонем пыштен лудаш тыршем. Кызыт калык ончылно шкем эрыканрак шижам. Марий йылме, марий почеламут ончыкылыклан кумда, волгыдо корным почыт манын ӱшанем, — ойла Максим.
Христина АЛЕКСАНДРОВА.
Фотом еш архив гыч налме.
