7-9 августышто Йошкар-Оласе Чарла кремльыште II Марий книга фестиваль эртаралтын. Тушко Марий Эл, Татарстан, Башкортостан, Чуваший, Мордовий, Удмуртий, Коми республикла, Виче, Рязань кундемла, Моско, Санкт-Петербург олала да Беларусь Республик Минск оласе савыктыш пӧртла гыч участник-влак ушненыт. Фестиваль кышкарыште кугыеҥ ден йоча-влак чонлан келшыше книгам наледеныт, мастер-класслаште у сомыллан тунемыныт, концертым онченыт, серызе-шамыч дене вашлийын кутыреныт. Снимкыште «Кече» йоча журналын эртарыме мастаргудыш ушнышо ӱдыр-влакым ужыда. Нуно йомакым возаш тунемыныт.
Вашлиймашым «Кече» йоча журналын сылнымут редакторжо Кристина Архипова эртарен. Тыгак ӱдыр-влак йоча серызе Виктор Мальцев дене палыме лийыныт.
– Мастер-класс моткоч оҥай ыле. Ятыр пайдале уверым пален налынам. Йомакым возаш шичме деч ончыч жанрым ойыраш, тӱҥ геройым шонен муаш кӱлеш. Йомак лудшым молан-гынат туныктышаш, – каласыш Марий книга фестивальыш ушнышо Лера Целищева. Ӱдыр Йошкар-Оласе 32-шо номеран школышто 4-ше классыш вончен.
Ончерыште книга-влак тӱрлӧ сынан лийыныт. А мыняре? Шотлен от пытаре! Кажныжым кучен лаштыклыме да налын кайыме шуын. «Марий книга издательстве» савыктыш пӧртын темлыме ончерыштыже утларакше Анжела Тимоеван «Танюш да мый» ден «Пеледыш таман пагыт», Наталия Семьянскаян «Добрые ёжики», Алексей Баевын «Жизнь Вовы» книгаже-влакым ойыреныт. Тыгак икшыве-шамыч ача-авашт, коча-ковашт деч «Белая лебёдушка» руш йылме дене возымо марий калык йомак сборникым налын пуаш йодыныт.
Марий Элын рӱдолаштыже эртаралтше книга пайремыш Виче кундем гыч Евгения Вадимовна Ильина кокымшо гана ушнен.
– Йоча-влаклан келшыше ятыр книгам конденна. Изирак ӱдыр-рвезе-влак мотор сӱретаным, йӱкым лукшым ойыреныт, фантастике жанр дене возымо савыктышым йодыныт. Йошкар-Олаште книгам куанен налыт, лудыт. Тидыже моткоч куандара, – палдарыш тудо.
Книга – мемнан туныктышына да поро йолташна. Марий книга фестивальыш ушнышо икшыве-влак тидым раш палат. Садлан лишыл еҥыштлан ятыр книгам налыктеныт, мӧҥгысӧ книгагудыштым пойдареныт.
Оля МАЙКОВА.
Авторын фотожо.
