Марий Эл Республиклан 105 ий теммылан да Калык-влакын икоян улмо кечылан пӧлеклалтше ятыр пайрем эртаралтын. Теве Медведево район Новый посёлкысо «Радуга» йочасадысе «Сказка» группыш коштшо икшыве-влак муреныт, почеламутым лудыныт, куштеныт, Салика дене пырля модыныт, туштылан вашмутым кычалыныт. Тидын нерген воспитательышт Л.М.Дроздова увертарен. «Ты йочасадынак «Паровозик» группысо ӱдыр-рвезе-шамыч тоштерыште жапым пайдалын эртареныт. Тошто арвер ден вургемым онченыт, легенде ден мурсемым колыштыныт», – серен И.Н.Семёнова. Советский район Шуарсола школышто тунемше-влак пайремыш мотор марий вургемым чиен толыныт, пеленышт чесым конденыт. Тидын нерген туныктышо Г.Г.Гусева палдарен. «Советский посёлкысо Йоча усталык пӧртыштӧ районысо фестиваль лийын. Тушто посёлкысо да районласе йочасад гыч ӱдыр-рвезе-шамыч мастарлыкыштым ончыктеныт (снимкыште). Пайремым Советский посёлкысо 5-ше номеран «Ромашка» йочасад эртарен», – возен Светлана Шабалина.
Светлана ШАБАЛИНАН фотожо
