«Ший памаш» регион-влак кокласе фестиваль-конкурсын йоча-влаклан пӧлеклалтше таҥасше 15 ноябрьыште И.С.Палантай лӱмеш тӱвыра да сымыктыш колледжын Калыкле сымыктыш гимназийыштыже эртаралтын. Республикын тӱрлӧ районжо, Свердловск кундем да Татарстан Республик гыч талантан ятыр ӱдыр-рвезе эстраде мурым йоҥгалтарен.
Йошкар-Оласе Бауман лицей пеленысе «Лира» йоча сымыктыш школын «Мозаика» йоча образцовый вокал да эстраде студийышкыже коштшо София Шишкина (снимкыште) «Марий ӱдыр» мурым сылнын мурымыж дене ойыртемалтын да Гран-при дене палемдалтын. Ӱдыр 2-шо классыште тунемеш.
– Мый вич ияш гычак мурем. Ончыч академический мурымаш утларак келша ыле, пытартыш жапыште эстраде деке шӱмаҥынам. Сеҥымашемлан моткоч йывыртенам. Шонен пыштыме семынак выступатленам, – ойла София.
Усталык пайремыште йоча-влак шкеныштым пеш чолган ончыктеныт. Нуно тургыжланымыштым кузе сеҥеныт? Ты йодышлан Н.А.Заболоцкий лӱмеш 2-шо номеран Шернур кыдалаш школышто 9-ше классыште тунемше Злата Васильева тыге вашештыш:
– Сценыш лекме черетым вучымо годым кумылым нӧлтышӧ тат нерген шонкалыман. Шӱлымӧ гимнастикым ыштыман. Мурымо годым лӱдмаш трук лектеш гын, шыргыжалман. Калык ончылно чӱчкыдын выступатлымаш шкем ӱшанлын кучаш туныкта.
Ӱдыр кум ияш улмыж годымак мураш тӱҥалын. Мастарлыкшым ятыр конкурсышто ончыктен. Сеҥымашыже-влак нерген «Ямде лийыштат» палдарыме. Ты фестивальыште тудын талантшым кӱкшын акленыт. Ӱдыр I степенян лауреат лӱм дене палемдалтын.
Оля МАЙКОВА.
Иван РЕЧКИНЫН фотожо.
