Оршанке район Кугунур школ шукылан палыме. Тудым тунем пытарыше-влакын: Марина Садован, Александр Марковын, Виктория Мочалован, Ксения Черёмушкинан – сылне мурышт Марий Эл радио дене чӱчкыдын йоҥгат. Пытартыш ийлаште эше Никита Козловым сценыште ужына. Рвезе усталык шӱлышан ешыште шочын-кушкын. Козловмыт (снимкыште) тачысе лаштыкнан унаже улыт.
Кум шӧртньӧ падыраш
Озавате Ольга Ивановна кум икшывым шкет ончен кушта. Тудо верысе школышто секретарьлан пашам ышта. Ӱшанле эҥертышыже – аваже Валентина Витальевна. Кум шӧртньӧ падырашыже чыланат усталык шӱлышан улыт. Никита Юл кундем кугыжаныш технологий университетыште кумшо курсышто инженерлан тунемеш. Изинек мурым мура, кушта, гитарым, гармоньым шокта.
– Никиталан усталык шӱлыш кочаж деч куснен, очыни: тудат гармоньым шокта ыле. Кок ияшак мураш тӱҥалын. Йочасадыште утренникыште «Антошкам» марла икымше гана йоҥгалтарен. Музыкым туныктышо Елена Сергеевна Рыбакова эргымым йочасад гычак марий семлан шӱмаҥден. Кугу тау тудлан. Школыш кайымеке, «Шонанпыл» ансамбльыш ушнен. Ансамбль дене калык ончыко чӱчкыдын лекмылан кӧра Никита шкенжым сценыште чолган куча. Луымшо классыште тунеммыж годым гитарым налаш йодын. Кум тылзыште перкалаш тунем шуын. Вара гармоньлан чонжо йӱлаш тӱҥалын. Тудымат нална. Шокташ пеш писын тунемын. Никита «Марий мурсем» ансамбльыш коштеш. Шке мурыж дене концертлашкат ушна. Пашамат ышташ жапым муэш. Моткоч кугешнем, – ойла Ольга Ивановна.
Кокымшо эрге – Матвей. Кандашымше классыште шинчымашым пога. Изаж деч вараш ок код. Кокымшо класс гыч «Шонанпыл» ансамбльыш ушнен. Изажын тошто гармоньжо дене шокташ тунемеш. Йӧратыме семӱзгарже дене ӱмаште сценышкат лектын. Изаже каныш кечылан толмыж годым иктаж-могай семым ончыкта да «Вес гана толмемлан тунем» манын кода. Рвезе моткоч тырша. Яра жапше лектешат, вигак кидыш гармоньым налеш. Изаж семын инженер лияш шона.
Изи шӱжарышт – куд ияш Вера. Школ пеленысе «Изи мӱкш» йочасадыш коштеш. Кушташ моткоч кумылан.
Шкешотан отро
Ольга Козлова – моткоч пашаче ӱдырамаш. Тӱрлӧ пакчасаскам ончен кушта. Пакчагӧргым кучаш икшыве-влакат полшат. Казам ашнат. Яра жапыште Ольга Ивановна кидпашам ышта. Ачаже икымше классыште улмыж годымак пидаш туныктен. Мочылам, модышым пидеш. Эше родо-тукымжо дене «На родное тепло родного дома» поро кумылым ончыктымо проектыш ушненыт. Специальный военный операцийыште улшо салтак-шамычлан меж носким, мочылам, тӱрлӧ аралтышым пидыт.
Козловмыт, еш дене погынен, чон почын кутыраш йӧратат. Пӱртӱс лоҥгаште каналташат жапым муыт. Тений кеҥежым Таир ер серыш миеныт.
– Еш – тиде шкешотан отро. Икте-весе коклаште йӧратымаш, умылымаш, пиал озаланышаш. Йочам шкет ончен кушташ куштылгыжак огыл, но икшыве – тиде мыйын илышем. Кажныжым иксемын йӧратем. Илышлан тауштен, кажне кечым йывыртен вашлийына. Суртышто йоҥгышо марий муро мыланна вий-куатым ешара, – ойла ава.
Христина АЛЕКСАНДРОВА.
Фотом еш архив гыч налме.
