Йоча-влак, Йошкар-Олаште Марий парк (шындер) чоҥалтеш. Тушто Тӱҥ капка, кугу да изи корно-влак, кудо, йоча вер, мурымо-куштымо вер да моло чоҥымаш лийыт. Тидыже айдемылан чоҥалтеш. А молыштлан иктаж-мом ыштен кертына мо? Кертына, шонена. Теве шырчыклан омартам ямдылена гын, илаш пурат ыле, мемнам мурышт дене куандарат. Садлан ме, «Шындер шырчык» клубын еҥышт, поро кумылым ончыктымо акцийым увертарена.
Шырчык омартам шкеак ямдылышаш улыда. Тудо тыгай лийшаш: кӱкшыт – 25-30 сантиметр, лопкыт – 20х20 сантиметр. Пурашлан – 3,5-5 сантиметр кугытан йыргешке рож. Омарта «картуз» 5 сантиметрлан ончыко лекше (йӱр деч авыртыш). Юж коштшо манын, ӱлнӧ 6 миллиметран рожым келыштарыза. Оҥа кишан лийшаш огыл. Тудым ида чиялте. Омарта кӧргым ида пужаре. Фамилийдам, лӱмдам да школдан лӱмжым, тыгак «2024» палым омарта саҥгаш але шола-пурла могырыш выжигатель дене когартен возыза.
Омартам шке але ача-ават, родет, йолташет полшымо дене Йошкар-Олаш 15 март марте кондыман: Гагарин проспект, 8-ше пӧрт (Мер-политике рӱдер), 310-шо пӧлем.
Эн чаткан, моторын ыштыме омартам ме Марий паркыште вераҥдена.
«Шындер шырчык» клуб.
