Тыге ойла Татарстан Республик Арск район Шорамучаш школышто тунемше Эмиль Антипов. Тудо шочмо кундемын, марий калыкын эртыме корныжым шергалаш йӧрата. Эртыкым шымлен, шинчымашыжым пойдара. «Марий школын историйже» шымлыме пашаже историйым, марий калык нерген палымыжым раш почын пуа. Ты пашам тудо Туныктышын да наставникын идалыкыштлан пӧлеклен.
– Мый марий улам. Тидын дене кугешнем. Шочмо йылмын моторлыкшым ешыште шижын кушкынам. Школыш кайымеке, марий сылнымутым йӧратен шынденам, – ойла Эмиль.
Школын историйжым шымлыме деч ончыч рвезе шочмо верже нерген поян материалым поген. Шорамучаш ялыште марий ден татар-влак икте-весылан полшен, келшен илат. Татар-шамычын илыме велым Шорамучаш, марий-влак могырым Шишор (ший ер) маныт. Школым почмаште Ведаска Алексеевын надырже кугу лийын. Тудо шке мландыжын ик ужашыжым школым чоҥаш пуэн. 1927 ийыште школышто 25 йоча тунемын. Икымше туныктышо-влак Морко район Унчо гыч О.Т.Тамнеев, Балтач район Улисъял гыч В.Н.Афанасьев да моло лийыныт. Эмиль шочмо школжо дене кугешна да тудын чапшым кӱшнӧ куча.
