Виче кундемыште руш, татар, одо, чуваш, армян да моло калык келшен илат. Нунын коклаште – шочмо тӱвырам йӧратыше, йӱлам жаплыше, пашаче марий калык. Кугурак ийготан-влак шинчымашыштым самырык тукымлан пӧлеклат. Виче кундем Вӱрзым ола гыч А.В.Курочкина (снимкыште – уныкаж-влак дене пырля) «Уржум-мари» верысе национально-культурный автономийым вуйлата. Ангелина ден Регина Курочкинамыт ковашт гаяк марий шӱлышан улыт.
Ангелина Вӱрзым оласе 2-шо номеран школышто 4-ше классым тунем пытарен. Мураш да кушташ йӧрата, кидпашалан кумылан. Коважлан сӧрастарыме марий ӱзгарым ышташ полша. Регина 3-шо номеран школышто 2-шо классым тунем пытарен. Музыкальный школышто фортепиано дене шоктымо мастарлыкшым вияҥда. «Шансонята» йоча вокал студийыш коштеш.
– Уныкам-влакын шочмекыштак, малтыме марий мурым мураш тӱҥалынам. Южгунам мурым чӱктенам. Кугурак лиймекышт, ӱдыр-влакын куанен колыштмыштым жапыштыже шекланен шуктен, сценышке лекташ ямдылаш тӱҥалынам. Такмакым йоҥгалтараш нунылан поснак келша. Тыгак «Мамонтёнокын мурыжо», «Канде вагон», «Чоя шошо» муро-влак эн йӧратыме улыт, – ойла Алевтина Владимировна.
Ангелина ден Регина Курочкинамыт марий мурышт дене ятыр конкурсышто, фестивальыште сеҥышыш лектыныт. Пайрем-влакымат чӱчкыдын сӧрастарат. Ончыкыжымат тыгаяк марий шӱлышан лияш тыланем.
