Йол йымалне ятыр тӱрлӧ кушкыл кушкеш: корнышудо, лопшудо, нуж, висвис… Икмыняржым ме раш палена. А южвыжым, кажне кечын ужына гынат, ны кузе маналтмышт, ны могай пайдам кондымышт нер- ген огына шоналте. Шернур округ Марисола школышто 11-ше классым тунем пытарыше Регина Мамаева (снимкыште) шочмо кундемыште кушшо кушкыл-влакым шымлен, гербарийым ыштен да «Атлас травянистых растений» электрон атласым чумырен.
— Марисола йыр 111 тӱрлӧ кушкыл кушкеш. Тышеч 23-шо — отызан культур, 22 сложноцветный, 18 губоцветный, 11 пырчан, молыжын чотышт шагалрак. Йошкар книгаш пуртымо ныл кушкыл уло: нарынче киякшудо, кудреватый лилий пeледыш, шем водяника, алтайский ветренице, — тыгай иктешлымашым ыштен Регина.
Ӱдыр кушкыл-влакым шошым да кеҥежым эскерен. Пашаштыже И.А.Губановын атлас-определительжым кучылтын. Биологий туныктышыжо В.Д.Бурда полшен. Фото почеш кушкылым пален налаш манын, келшыше приложенийым кучылтын.
— Шымлыме годым рокын ойыртемжым, климатым, мланде куралмым да ятыр вес палым шотыш налынам. Шернур кундемыште июльышто южын кокла температуржо 18 градус марте кӱзен, январьыште -14 градус марте волен. Вӱдыжгылыкым шотлаш нелырак. Вершӧр курыкан. 31 эҥер, кугуракше — Лаж, Немда, Сердяжка, лу плотина, коло утла пӱя уло. Чодыра 18,3 процент мландым айла. Марисола Оно да Шаба эҥерла коклаште верланен. Кум могырым — чодыра. Ял-влак икте-весе деч тораште огыл верланеныт. Вольык кызыт уке гаяк, а ожно ситышын лийын. Садлан пасум шымлыме годым нунын кӱтӱштӧ мландым тошкымышт нергенат мондыман огыл, — ойла ӱдыр.
Шымлыме паша пеш лектышан лийын. Атласым биологий урокышто, тӱрлӧ кружокышто кучылтыт.
Оля МАЙКОВА.
Фотом еш архив гыч налме.
