11 август — ошпоҥгын кечыже.
Кеҥежым чодыраш миен толаш могай ямле. Теве ладыра куэ, чевер пызле. Туштак кож, нулго, пӱнчӧ ужар сывынышт дене моторын койын шогат. Чылажат чоным куандара. Сӧрал марий чодырана моткоч поян.
Тушто ошпоҥгым мумемлан моткоч йывыртенам (снимкыште). Тудым эн тамлылан шотлем. Витаминлан поян поҥго куэ да пӱнчӧ йымалне шочеш, вӱдыжгырак верым йӧрата. Пушеҥгылан ятыр пайдам конда. Упшыжо 25 сантиметр марте кушкын да тӱсым вашталтен кертеш.
Йомак ден легендылаште ошпоҥгым пиалым кондышылан шотлат. Тудым мушо еҥын шонымашыже шукталтеш, маныт.
Юля ВОРОНЦОВА.
Йошкар-Ола.
Фотом еш архив гыч налме
