Светлана Бессонова йочалан возышо серызе семын палыме. Шукерте огыл «Лудаш да шотлаш тунемына» у книга дене уэш куандарыш. Автор тушко йоча почеламут-влакым пуртен.
– Тӱҥ шонымашна – ньога-шамычын шинчымашыштым келгемдаш. Лудаш да шотлаш илыш гыч налме пример-влак да тӱрлӧ таҥастарымаш гоч туныкташ. Куштылго йылме дене возаш тыршенам. Шонымашем «Марий книга издательстве» савыктыш пӧрт шукташ полшен. Редакторем Надежда Геннадьевна Никитиналан – поснак кугу тау, – ойла Светлана.
Книга кок йылме дене лектын: марла да рушла. Почеламут-влакым А.Г.Васильева кусарен. Лаштыклам сӱретче-влак С.Тупицына ден Е.Волохова сӧрастареныт.
Книгам «Марий книга издательстве» савыктыш пӧртыштӧ налаш лиеш.
