Волжский район Памар школ гыч Карина Тихонова ден Екатерина Александрова кидпашалан шӱман улыт. Нуно марий тӱрым тӱрлат. Мастарлыкыштым вияҥдаш кидмастар-шамыч дене палыме лийыт. Приволжский посёлкышто илыше дизайнер, модельер Евгения Кошкина нерген шымлыме пашам возеныт. Тиде кидмастарым Марий Элыште веле огыл, Россий мучко палат. Тудым эсогыл «Лица России. XXI век» книга-альбомышко пуртеныт. ™дыр-влак Е.Кошкинам XXI курымын талешкыжлан шотлат.
– Евгения Александровна пидеш, тӱрла, урга, марий сынан вургемым шке шонен луктеш, сӧрастарыме ӱзгарым ышта да нунын дене вес кундемлаште илыше калыкым палдара. Тудын пашалаштыже кӧргӧ чон шижмаш, марий калыкым пагалымаш, марий йӱлам жаплымаш озаланат. Ме тудын «шочыктымо» арверже-влакым кугу куан да кугешнымаш дене онченна, – ойлат ӱдыр-влак.
Уста, марий чонан ӱдырамашын илыш корныжым шергалын, тудын пашалажым ончен, ӱдыр-влакын ум, ойыртемалтшым, тӱҥжӧ марий тӱр дене кылдалтше арверлам шке ышташ кумылышт шочын.
