Меж гыч «илыше» сӱрет

Волжский район Шарача селасе «Шонанпыл» тӱвыра пӧрт пелен «Кидмастар» студий пашам ышта. Тышке толшо кажне еҥ поро йолташым да чонлан келшыше пашам муэш. Тушто пидаш, тӱрлӧ йолчиемым, сумкам йӧраш тунемыт. Фон флористике, меж акварель, декупаж, батекс  техникылам кучылтын, сӱретым, пеледышым ыштат. Студийын ик участникше – А.С.Майкова. Тудо Волжский район Пызырьгуб ялыште ила, меж гыч сӱретым «сӱретла».
– Антонина Сергеевна, ты пашалан шукерте огыл тунемында. Сӱретда-влакым чумырен, ончерымат почаш лиеш. Кушечын тиде тӱҥалын?
– Икымше гана меж ден «сӱретлымым» «Кидмастар» студийыште ужынам. Мыланем иканаште келшен. Умбакыже шке гыч тунемаш тӱҥалынам. Интернетыште шуко онченам. Ты технике дене лишкырак палыме лийынам. Келшыше сӱретым муамат, марий мурым чӱктем да, чон канен, йӱдвошт сӱретлен кертам. Акварель чия дене сӱретлыме годым йоҥылыш ыштет гын ӱштылаш сай огыл, а межым пинцет дене кораҥдаш лиеш. Кӱлеш тӱсым кычалме годым икмыняр тӱсан межым кӱрыштын келыштараш куштылго. Мый сӱретче омыл, кузе тыгай сӱрет лектеш манын южгунам шкежат ӧрам.
– Ик сӱретым ышташ мыняр жап кая? Сӱретлаш темым кузе ойыреда?
–Изи сӱретым кок-кум кече ыштем, кугум келыштараш кум арня наре кая.  Мый чон йодмо почеш сӱретлем. Сандене кажне сӱретем илыше гай. Могай сӱрет келша, тугайым ыштем. Утларакше янлык-влак улыт, мотор пӱртӱс кумылем нӧлта. Мый ятыр ий йочасадыште тыршенам, сандене, очыни, йочалан келшыше сӱретемат ятыр. Шуко пашамым йочасадлан пӧлекленам.
– Те ятыр ий икшыве-шамыч дене пашам ыштенда, нуным туныкташ кумылда уке?
– Меж гыч сӱретлаш йӧсӧ огыл. Йоча-влак авашт дене пырля ыштен кертыт. Тунемаш шонышо-влаклан каҥашым пуаш нигунам тореш омыл. Кызыт Милана уныкам туныктем. Тудо сӱретлымемым онча, йодыштеш, вара межым опта. Икмыняр ий гыч Милана ден когыньнан сӱрет ончерна лиеш манын ӱшанем.