Татьяна Труфанова – курыкмарий поэтессе, прозаик. Тудо Курыкмарий районысо Шурмар ялыште шочын. Йоча жапше Коговал ялыште эртен. Пайскырык (Пайгусово) школым тунем пытарымеке, Марий кугыжаныш университетыш марий йылме да литератур, руш йылме да литератур туныктышылан тунемаш пурен.

– Татьяна, сылнымутлан кузе шӱмаҥында?

– Школышто тунеммем годым сочиненийым возаш моткоч йӧратенам. Руш йылмым да литературым Светлана Константиновна Еронова туныктен. Икымше почеламутем-влак рушла лийыныт. Тунам пӱртӱс, шочмо кундем, кайык, лишыл еҥ-влак нерген возенам. Но нигӧлан ончыктен омыл. Вара нуным коҥгаште йӱлалтенам. «Жерӓ» райгазетышке заметке-влакым возкаленам. Университетыш тунемаш пурымеке, преподаватель Николай Иванович Куторов курыкмарий литературлан кумылаҥден. Тудын полшымыж дене писатель-влак Виталий Петухов, Михаил Кудряшов дене палыме лийынам.

– Курыкмарла возымо икымше почеламутдам шарнеда?

– Шарнем. Тудо «Теле» маналтын, «У сем» журналыште савыкталтын. Тӱҥ редактор Михаил Иванович Кудряшовын шомакше-влак тачат ушыштем улыт: «Таня, возен шого, тунем лекмекетат, тиде корно гыч ит кораҥ». Тыге почеламут почеш почеламут шочын. Вара вич ойлымашым да ик поэмым возенам. А поэзий мыланем южла кӱлеш.

– Шукыж годым мо нерген возеда?

–Айдеме-влак кокласе кыл, пӱртӱс, шочмо вер нерген возем. Утларакше кугыеҥ-влаклан келшышым серем.

– Те кызыт йочасадыште пашам ыштеда. Ньога-влакын койышыштым эскерен, кутырымыштым колыштын, йоча почеламут ден ойлымаш-влак шочыт, очыни.

– Мутат уке, йоча-влак возаш кумылаҥдат. Эркын-эркын тыгай сынан произведений-влакат шочыт, шонем.

2017 ийыште «Ший памаш» сылнымут фондын Марий Элын калык писательже В.Абукаев-Эмгак лўмеш эртарыме  сылнымут конкурсышто эн сай прозо номинацийыште «Ошкеча» премий дене палемдалтын.